A Paolo

Bellinzona, 13 giugno 2012

Caro zio Paolo,

al so che a t'ho mai scrivü una lètera, ma adess sun dré a fall. E probabilment te sa domandaré "Perché?". Perché a pensi che l'è un bel modo per bütà föra un po' da quela tristezza che g'ho denta, perché l'è un modo per condiviid con i altri quel che prövi. A l'è mia un granché, ma a g'ho metü sés més, da quando la mama la m'ha ciamaa quela sira a metà dicembro, per scrivala. G'ho metü insci tanto, perché ogni volta che ma sa meti setaa giò davanti al computer, prunt per comincià, a ma sa rendi cünt che l'è dificil. Ogni volta: intant che scrivi a piangi, e intant che piangi a scrivi! L'è staja düra, ma pensi che questa prima pagina, la m'ha fai ben (e forse la sarà mia neanche l'ültima). L'è mia stai facil, ma a vaar la pena da fall, perché se sa riéss a sfogass, pö a sa sta un po' mei. E pö sun sicür che, in un mo(n)do o in da l'altro, te riüsaree a legiala.

Següta a tornam in ment quando te vegnivi a trovaac, senza dii nient. Te sonavat al campanell o te saltavat via al cancell e ta trovavum davanti ala porta. Ogni volta che te rivavi l'era una sorpresa.

Insci come te rivavi a trovaac, però, te se nai via. In svelt, trop in svelt. Senza dii nient. Propi 'dèss che seri dre a imparaa a cognosat. Propi 'dèss che vedevi in dal me Zio, anche se a l'era lontan, quaicoss püsée che un zio. Propi 'dèss che gh'evi tanti ropp da cüntat sü, e magari anche ti te ga n'evi.

Da dicembro a ma capita ammo' da incontrat, in sögn. Püsée spèss da prima, püsée spèss da quanto ta incontravi dal viif. Pürtropp l'è mia la stésa roba, a podi mia brasciàt sü, podi mia stringiat la man, podi mia sentì al t'ho profüm. Gh'è comunque la picola sodisfazion da podee (ri)vedet. Ogni tant a riési anche a sentii la to voos. E parlum. Te disi sempro di bei ropp.

A gh'è sempro un quaicoss che, senza dövée cercaal, a ma ricorda al to suris. Un tòc da formàgg, una parola, una foto o una canzon. Forse i canzon, insema al formàgg, i'è quei che funziona mei. Ho ricominciaa a scoltà i Pink Floyd, con un altro para da orécc. Ogni volta che a senti una so canzon te ma vegni in ment, e l'è bell! Avresi sempro vörü domandat quale l'è la to preferida. Forse 'Shine on you Crazy Diamond', vist che ta l'ha sonada per salüdat. O forse amo' 'High Hopes', al so mia, ma sun sicür che questa l'è vüna di me, perché  la grande speranza, mi a ga l'ho. Quela speranza che ma fa pensaa che un dì a sa rivedrem, so mia dove, so mia quando. E quel dì podrò finalment domant questo e tanti altri ropp.

Intant che 'l speci, a ta porti con mi nala testa e nel cör.
Ta vöri ben, avresi vörü dital (amo') tanti volt!

Nica